KOMUNIKADO DI PRENSA

Tradishonal fiesta di Lions ta pinta di bira algu ku bo no mag pèrdè

FIESTA DI KARNAVAL DI LIONS CLUB CURAÇAO E AÑA AKI ‘DESTINATION…CARNIVAL”

Willemstad- E aña aki, meskos ku e añanan anterior, Lions Club Curaçao ta bin ku un fiesta di kita sombré. E aña aki dia 14 di febrüari nos ta kue rumbo pa “Destination… Carnival.” Manera e nòmber ta indiká, bishitantenan di e fiesta di Lions lo dal un keiru bishitando vários lugá kaminda karnaval ta keda selebrá engrande manera Brazil, Mexico, Trinidad, Hulanda i naturalmente nos tradishonal kaya grandi Otrobanda.

Sin ke kita nada for di e fiestanan anterior, esaki ta pinta di bira un di e fiestanan di karnaval mas grandi di Lions ora ku World Trade Center keda kombertí den un ”Destination...Carnival.” Karchinan pa e fiesta ta optenibel serka miembronan di Lions Club Curaçao na rason di Nafl.200,-. E preis aki ta ‘all in' i ta inkluí sinku bufèt i ‘open bar' henter anochi!!

E fiesta di Lions Club Curaçao no mester di introdukshon. Entradanan for di e fiesta aki ta keda destiná pa proyektonan na bienestar di komunidat. Tradishonalmente Lions Club Curaçao ta tene e fiesta aki na Fort Nassau pero e aña aki e klup di Lions ta bai purba algu otro i a skohe pa tene e fiesta den World Trade Center. Naturalmente e arkitektonan di bon ambiente di Lions Club Curaçao lo no ta nan mes si nan no a perkurá pa e sitio nobo aki ta garantisá di e bon ambiente di semper. Ta pa e motibu aki tambe a skohe un tema ku ta hasié posibel pa tur hende ku bishita e fiesta tradishonal di Lions por gosa na su antoho.

”Destination…Carnival” ta un homenahe na paisnan ku sa di selebrá karnaval. Brazil, Mexico, Trinidad, Ulanda i nos mes lo ta bon representá den e fiesta aki. Tantu e sitionan komo e bufèt di kumindanan lo ta representá e diferente destinashonnan.

Asina mes Exibition Hall a keda reserva pa Brazil i nos karnaval. Un ñapa di e loke ku por spera ta ku lo kombertí parti di e Exibition Hall den nos kaya grandi ku e.o. un Neto Bar na un banda i edifisio di loteria nashonal na otro banda i e dushi ambiente rondó di treilernan den kaya. Algu ku bo no mag pèrdè. Naturalmente e músika lo ta ofresé pa e mihónan ora ta trata di Karnaval. ERA, Doble R, Happy Peanuts, Rumba band, steelband i D.J. Boogieman lo perkurá pa ambiente non stòp sin stòp.

Anto loke no por falta ta e kicknan ku semper Lions so por tin ora ta trata di bon ambiente.

Karchinan pa e fiesta for di awe ta na benta serka miembronan di Lions Club Curaçao. Karchinan ta na benta na rason di Nafl.200,-. No ta un sekreto ku bo mester sali lihé buska bo karchi pa e fiesta di Lions. Pues perkurá pa bo tin bo karchi ku ta garantisá bo entrada pa e destinashon di legria dia 14 di febrüari próksimo ora Lions presentá “Destination....Carnival.”